ஓய்வூதியம், ஊழியர்களின் சம்பளம் மற்றும் அன்றாட நிர்வாகச் செலவுகளுக்குத் தேவைப்படும் நிதியில் பாதி மட்டுமே கிடைத்துள்ளதால், இப் பற்றாக்குறையைச் சமாளிக்கப் பல்கலைக்கழகத்தின் வைப்பு நிதியை (Corpus Fund) பயன்படுத்த வேண்டிய சூழல் மீண்டும் ஏற்படலாம் என்றும், இது குறித்து ஒரு வருட இடைவெளிக்குப் பிறகு நடைபெறவுள்ள செனட் கூட்டத்தில் விவாதிக்கப்படலாம் என்றும் தெரிகிறது.

மாநில அரசு பல்கலைக்கழகங்களுக்கென ஒதுக்கிய 767 கோடி ரூபாயில் பெரும் பகுதி அண்ணாமலைப் பல்கலைக்கழகத்திற்குச் சென்றுவிட்ட நிலையில், சென்னை பல்கலைக்கழகத்தின் நிதியைச் சீரமைக்க அரசு தனிச் சிறப்பு நிதியை ஒதுக்க வேண்டும் என்றும், வருவாயைப் பெருக்கும் வழிகளைப் பல்கலைக்கழகம் கண்டறிய வேண்டும் என்றும் கல்வியாளர்கள் கோரிக்கை விடுத்துள்ளனர்.

தொலைதூர கல்வி முறையில் படிப்பவர்கள் ஒரே நேரத்தில் 2 பட்டப்படிப்பு படிப்பதற்கான திட்டங்களில் சேர அனுமதிக்கப்படுவார்கள் என்று சென்னை பல்கலைக்கழகம் தயாரித்துள்ள இரட்டை பட்டப்படிப்புகளுக்கான வரைவு வழிகாட்டுதல்களில் தெரிவிக்கப்பட்டுள்ளது. இந்த வரைவு வழிகாட்டுதல்கள் பல்கலைக்கழகத்தின் சிண்டிகேட் கூட்டத்தில் ஒப்புதலுக்காக வைக்கப்படுகிறது. இந்த இரட்டை பட்டப்படிப்பானது சான்றிதழில் குறிப்பிடப்படும் என்று வழிகாட்டுதல்களில் தெரிவிக்கப்பட்டுள்ளது.

2022-ம் ஆண்டு பல்கலைக்கழக மானியக் குழுவின் அறிவிப்பை தொடர்ந்து, அதை செயல்படுத்த சென்னை பல்கலைக்கழகம் முடிவு செய்தது. இரட்டை பட்டப்படிப்பு சேர்க்கைக்கான வழிகாட்டுதல்களை வகுக்கும் பணி தொலைதூர கல்வி நிறுவனத்திடம் ஒப்படைக்கப்பட்டு உள்ளது. இதுகுறித்து பல்கலைக்கழக பேராசிரியர் ஒருவர் கூறியதாவது:

தேசிய கல்விக் கொள்கை-2020 பரிந்துரைகளில் இரட்டை பட்டம் என்பது இடம்பெற்றுள்ளது. வணிகம், கலை மற்றும் அறிவியல் படிப்புகளை படிக்கும் மாணவர்கள் கூடுதல் பாடத்தை படிப்பதன் மூலம் தங்களின் திறமைகளை வளர்த்துக்கொள்ள முடியும். பிளஸ்-2 தேர்வுகளில் மாணவர்கள் அதிக மதிப்பெண் பெற்றதால் நகரங்களில் உள்ள கல்லூரிகளில் பி.காம். சேர்க்கை மிகவும் கடினமாக உள்ளது.

பி.ஏ. பொருளாதாரம் படிக்கும் ஒரு மாணவர் தொலைதூர கல்வி முறையில் பி.காம் படிப்பில் சேர்ந்து ஒரே நேரத்தில் 2 பட்டப்படிப்புகளை படிக்கலாம். இது அவர்களுக்கு ஆர்வமுள்ள துறையில் வேலை வாய்ப்பை பெற உதவும். இது கலை மற்றும் அறிவியல் படிப்புகளில் படிக்கும் மாணவர்களுக்கு பயனளிக்கும். தொலைதூர கல்வி முறையில் பி.சி.ஏ. மற்றும் பி.பி.எம். பட்டம் பெறுவது கலை மற்றும் அறிவியல் மாணவர்களுக்கு மிகவும் மதிப்புமிக்கதாக இருக்கும்.

இவ்வாறு அவர் கூறினார்