வரவிருக்கும் பண்டிகைக் காலத்தில் சர்க்கரை தடையின்றி கிடைப்பதை உறுதி செய்யவும் மற்றும் உள்நாட்டுச் சந்தையில் அதன் விலையைக் கட்டுப்பாட்டுக்குள் வைத்திருக்கவும், 10 லட்சம் மெட்ரிக் டன் கச்சா சர்க்கரையை வரியின்றி இறக்குமதி செய்வதற்கான காலக்கெடுவை டிசம்பர் 31 வரை நீட்டித்து மத்திய அரசு உத்தரவிட்டுள்ளது.
மத்திய வெளிநாட்டு வர்த்தகப் பொது இயக்ககம் (DGFT) வெளியிட்டுள்ள புதிய அறிவிப்பின்படி, சுங்க வரிக் கோட்டா (TRQ) முறையின் கீழ் ஏற்கெனவே நிர்ணயிக்கப்பட்டிருந்த அக்டோபர் 31 காலக்கெடு, மேலும் இரண்டு மாதங்களுக்கு நீட்டிக்கப்பட்டுள்ளது.
உள்நாட்டு உற்பத்தி சரிவு மற்றும் சர்வதேசச் சந்தையில் நிலவிய அதிக விலை காரணமாக ஒதுக்கப்பட்ட கோட்டாவில் மிகக் குறைந்த அளவே இறக்குமதி செய்யப்பட்ட நிலையில், இந்தத் தீபாவளி மற்றும் பண்டிகைக் காலத்தில் நாட்டில் சர்க்கரை பற்றாக்குறை ஏற்படுவதைத் தவிர்க்கவும், சர்க்கரை விலையைக் கட்டுக்குள் வைக்கவும் மத்திய அரசு இந்த முடிவை எடுத்துள்ளது.