கென்யா சென்றடைந்த இந்திய கடற்படையின் போர்க்கப்பல்

இந்தியக் கடற்படையின் அதிநவீனப் போர்க்கப்பலான ஐஎன்எஸ் திரிகண்ட் (INS Trikand), கடல்சார் ஒத்துழைப்பை மேம்படுத்தும் நோக்கில் கென்யாவின் மொம்பசா (Mombasa) துறைமுகத்தைச் சென்றடைந்துள்ளது.

இந்தியப் பெருங்கடல் பிராந்தியத்தில் பாதுகாப்பை உறுதிப்படுத்தவும், நட்பு நாடுகளின் கடற்படைகளுடன் நல்லுறவை வளர்க்கவும் மேற்கொள்ளப்படும் நீண்ட தூரப் பயணத்தின் ஒரு பகுதியாக இந்தப் பயணம் அமைந்துள்ளது. மொம்பசாவில் தங்கியிருக்கும் காலப்பகுதியில், இந்தியக் கடற்படை அதிகாரிகள் கென்யப் பாதுகாப்புப் படையினருடன் இணைந்து கூட்டுப் பயிற்சி, தொழில்முறைப் பரிமாற்றங்கள் மற்றும் இருநாட்டு உறவை வலுப்படுத்தும் பல்வேறு நிகழ்வுகளில் ஈடுபட உள்ளனர்.

கடற்கொள்ளையர் தடுப்பு மற்றும் கடல்சார் பாதுகாப்பில் இந்தியாவின் பங்களிப்பை இந்தப் பயணம் மீண்டும் உறுதிப்படுத்துவதுடன், ஆப்பிரிக்க நாடுகளுடனான இந்தியாவின் ஆழமான நட்புறவுக்குச் சான்றாகவும் அமைகிறது.