X

திருப்பரங்குன்றம் மலையில் உள்ள தூணில் கார்த்திகை தீபம் ஏற்ற உச்ச நீதிமன்றம் நிபந்தனையுடன் அனுமதி!

மதுரை திருப்பரங்குன்றம் மலையில் உள்ள தூணில் கார்த்திகை தீபம் ஏற்ற அனுமதி அளித்த சென்னை உயர் நீதிமன்றத்தின் உத்தரவை எதிர்த்துத் தமிழக அரசு மற்றும் சம்பந்தப்பட்ட தரப்புகள் தாக்கல் செய்த மேல்முறையீட்டு மனுக்களை விசாரித்த உச்ச நீதிமன்றம், 2026-ஆம் ஆண்டு நவம்பர் 24-ஆம் தேதி நடைபெற உள்ள கார்த்திகை தீபத் திருநாளில் மட்டும் அந்தத் தூணில் தீபம் ஏற்ற நிபந்தனைகளுடன் இடைக்கால அனுமதி வழங்கி உத்தரவிட்டுள்ளது.

முன்னதாகச் சிக்கந்தர் பாதுஷா தர்கா அருகே உள்ள இந்தத் தூணில் கார்த்திகை தீபம் ஏற்றலாம் எனச் சென்னை உயர் நீதிமன்ற மதுரைக் கிளை தனி நீதிபதி உத்தரவிட்டதையும், அதனை இரு நீதிபதிகள் அமர்வு உறுதி செய்ததையும் எதிர்த்துத் தமிழக அரசு மற்றும் மாவட்ட ஆட்சியர் தரப்பில் உச்ச நீதிமன்றத்தில் மேல்முறையீடு செய்யப்பட்டது.

விசாரணையின் போது, அந்தத் தூண் பிரிட்டிஷ் ஆட்சிக் காலத்தில் அமைக்கப்பட்ட நில அளவைக் கல் என்றும், அங்கு நீண்டகாலப் பாரம்பரிய வழக்கம் இல்லை என்றும், சட்டம்-ஒழுங்கு மற்றும் வழிபாட்டு நடைமுறை மாற்றங்கள் குறித்தும் தமிழக அரசு மற்றும் தர்கா தரப்பில் வாதங்கள் முன்வைக்கப்பட்டன.

மறுபுறம், தர்கா பகுதிக்கு வெளியே உள்ள கோயில் நிலத்தில் இத்தூண் அமைந்திருப்பதாகவும், பக்தர்களின் வழிபாட்டு உரிமை அடிப்படையில் தீபம் ஏற்ற அனுமதிக்க வேண்டும் என்றும் மனுதாரர்கள் மற்றும் இந்து அமைப்புகள் தரப்பில் வாதிடப்பட்டது.

அனைத்துத் தரப்பு வாதங்களையும் கேட்ட உச்ச நீதிமன்ற நீதிபதிகள் அரவிந்த் குமார் மற்றும் விபுல் எம். பஞ்சோலி அடங்கிய அமர்வு, வரும் நவம்பர் 24 கார்த்திகை தீபத் திருநாளன்று மட்டும் ஒருமுறை தீபம் ஏற்ற அனுமதி அளித்ததுடன், இந்த உத்தரவைத் தொடர்ந்து வரும் ஆண்டுகளில் நிரந்தர உரிமையாகக் கோர முடியாது என்றும், பிரதான மேல்முறையீட்டு வழக்கு விசாரணை தொடர்ந்து நடைபெறும் என்றும் தெளிவுபடுத்தியுள்ளது.