தமிழக அரசுப் பணியில் சேர வேண்டும் என்ற கனவுடன் காத்திருக்கும் தேர்வர்களுக்கு முக்கிய அறிவிப்பு வெளியாகியுள்ளது. தமிழ்நாடு அரசுப் பணியாளர் தேர்வாணையம் (TNPSC) நடத்தும் குரூப்-4 தேர்வுக்கு விண்ணப்பிப்பதற்கான கால அவகாசம் இன்று (நவம்பர் 8) முடிவடைகிறது.
இதுவரை விண்ணப்பிக்காத தகுதியுள்ள நபர்கள் இன்று இரவு 11.59 மணிக்குள் தேர்வாணையத்தின் அதிகாரப்பூர்வ இணையதளமான https://www.tnpsc.gov.in/ வாயிலாக தங்களது விண்ணப்பங்களைச் சமர்ப்பிக்க வேண்டும்.
விண்ணப்பத்தில் திருத்தம் செய்ய வாய்ப்பு
விண்ணப்பத்தைச் சமர்ப்பித்த பிறகு அதில் ஏதேனும் தவறுகள் இருப்பது தெரியவந்தால் கவலைப்படத் தேவையில்லை. விண்ணப்பதாரர்கள் தங்களது விவரங்களைச் சரிபார்த்து, தேவையான மாற்றங்களை மேற்கொள்ள நவம்பர் 9 முதல் நவம்பர் 11 வரை கால அவகாசம் வழங்கப்பட்டுள்ளது.
ஜனவரி 10-ல் எழுத்துத் தேர்வு
குரூப்-4 தேர்வு 2027 ஜனவரி 10-ம் தேதி நடைபெற உள்ளது. அன்று காலை 9.30 மணிக்குத் தொடங்கும் தேர்வு மதியம் 12.30 மணி வரை நடைபெறும் என TNPSC அறிவித்துள்ளது.
அரசுப் பணியில் சேர விரும்பும் தகுதியான தேர்வர்கள் கடைசி நேரம் வரை காத்திருக்காமல், இன்றே விண்ணப்ப நடைமுறையை நிறைவு செய்யுமாறு அறிவுறுத்தப்படுகிறார்கள்.