இனி ‘இந்தியா’வுக்கு பதில் ‘பாரத்’ என்ற சொல்லை மட்டுமே பயன்படுத்த வேண்டும் – மத்தியப் பிரதேச பல்கலைக்கழகங்கள் முடிவு

மத்தியப் பிரதேசம் மற்றும் சத்தீஸ்கர் மாநிலங்களில் உள்ள பல்வேறு மாநில மற்றும் மத்தியப் பல்கலைக்கழகங்கள், தங்களின் பட்டப் படிப்புச் சான்றிதழ்கள் (Degrees), மதிப்பெண் பட்டியல்கள் (Marksheets) மற்றும் தகவல் பலகைகளில் (Signboards) இனி ‘இந்தியா’ (India) என்ற ஆங்கிலச் சொல்லுக்குப் பதிலாக ‘பாரத்’ (Bharat) என்ற சொல்லைப் பயன்படுத்த அதிரடியாக முடிவெடுத்துள்ளன.

சத்தீஸ்கரின் பிலாஸ்பூரில் உள்ள புகழ்பெற்ற குரு காசிதாஸ் மத்தியப் பல்கலைக்கழகம், மத்தியப் பிரதேசத்தின் இந்தூரில் உள்ள தேவி அகில்யா விஸ்வவித்யாலயா மற்றும் ஜபல்பூரில் உள்ள ராணி துர்காவதி பல்கலைக்கழகம் உள்ளிட்ட கல்வி நிறுவனங்கள் தங்களின் ஆட்சிமன்றக் குழு கூட்டங்களில் இதற்கான அதிகாரப்பூர்வ தீர்மானங்களை நிறைவேற்றியுள்ளன.

கடந்த 2023 ஜி20 மாநாட்டின் போது நாட்டின் உயரிய அரசியலமைப்பு அமைப்புகளால் ‘பாரத்’ என்ற பெயர் பயன்படுத்தப்பட்டதை முன்மாதிரியாகக் கொண்டும், நம் நாட்டின் கலாச்சாரம் மற்றும் பாரம்பரிய வேர்களைப் பலப்படுத்தும் நோக்கிலும் இந்த வரலாற்றுச் சிறப்புமிக்க மாற்றம் கொண்டு வரப்பட்டுள்ளது.

தற்போது பல்கலைக்கழகங்களில் கையிருப்பில் உள்ள பழைய மதிப்பெண் சான்றிதழ்கள் தீர்ந்தவுடன், அடுத்து அச்சிடப்படும் புதிய சான்றிதழ்கள் அனைத்திலும் இந்தி மற்றும் ஆங்கிலம் ஆகிய இரு மொழிகளிலுமே ‘இந்தியா’ என்ற வார்த்தை முற்றிலுமாக நீக்கப்பட்டு ‘பாரத்’ என்ற பெயரே இடம்பெற உள்ளதால், இது கல்வித்துறையிலும் தேசிய அளவிலும் பெரும் விவாதத்தை ஏற்படுத்தியுள்ளது.