மதுபானங்களுக்குக் கட்டாயமாக ரசீது வழங்க வேண்டும் – டாஸ்மாக் நிர்வாகத்திற்கு நீதிமன்றம் உத்தரவு

தமிழகம் முழுவதும் உள்ள அனைத்து டாஸ்மாக் மதுபானக் கடைகளிலும் விற்கப்படும் மதுபானங்களுக்குக் கட்டாயமாக ரசீது (Bill) வழங்கப்பட வேண்டும் என்று டாஸ்மாக் நிர்வாகத்திற்குச் சென்னை உயர் நீதிமன்றம் அதிரடி உத்தரவைப் பிறப்பித்துள்ளது.

நிர்ணயிக்கப்பட்ட விலையை விடக் கூடுதலாகக் கட்டணம் வசூலிக்கப்படுவதைத் தடுப்பது மற்றும் விற்பனையில் வெளிப்படைத்தன்மையை உறுதி செய்யும் நோக்கில் பிறப்பிக்கப்பட்டுள்ள இந்த உத்தரவை உடனடியாக அமல்படுத்த வேண்டும் என நீதிமன்றம் அறிவுறுத்தியுள்ளது.

மேலும், டாஸ்மாக் கடைகளில் ரசீது வழங்கும் நடைமுறை அமல்படுத்தப்பட்டது குறித்த விரிவான அறிக்கையைத் தாக்கல் செய்ய டாஸ்மாக் நிர்வாகத்திற்கு உத்தரவிட்ட சென்னை உயர் நீதிமன்றம், இந்த வழக்கின் அடுத்தகட்ட விசாரணையை வரும் ஆகஸ்ட் 7-ஆம் தேதிக்குத் தள்ளிவைத்து நடவடிக்கை எடுத்துள்ளது.