Tamilசெய்திகள்

இந்தியாவில் கல்வி முறையை மறுபரிசீலனை செய்ய வேண்டியது அவசியம்! – வல்லுநர்கள் கருத்து

இந்தியாவின் கல்வி அமைப்பில் மாணவர்களின் மதிப்பெண்கள் மற்றும் தரவரிசைகளுக்கு மட்டும் அதிக முக்கியத்துவம் அளிக்கப்படும் சூழல் மாறி, அவர்களின் மனநலன் மற்றும் உணர்ச்சிசார் நல்வாழ்வை மையமாகக் கொண்டு கல்வி முறையை மறுபரிசீலனை செய்ய வேண்டிய அவசியத்தை இன்றைய சூழல் வலியுறுத்துகிறது.

தேசிய குற்ற ஆவணக் காப்பகத்தின் (NCRB) சமீபத்திய தரவுகளின்படி, 2024-ஆம் ஆண்டில் மட்டும் இந்தியாவில் 14,488 மாணவர்கள் தற்கொலை செய்து கொண்டுள்ளனர். இதில் மகாராஷ்டிரா, உத்தரப் பிரதேசம், மத்தியப் பிரதேசம் மற்றும் தமிழ்நாடு ஆகிய மாநிலங்கள் மட்டும் பதிவான மாணவர்களின் தற்கொலைகளில் 43 சதவீதத்தைக் கொண்டுள்ளன.

தேர்வு பயம், கடுமையான போட்டி மற்றும் பெற்றோரின் அதீத எதிர்பார்ப்புகள் போன்ற பல்வேறு அழுத்தங்களால் சிறுவயதிலேயே குழந்தைகள் கடுமையான மன உளைச்சலுக்கு ஆளாகின்றனர். கல்வி என்பது மதிப்பெண் இயந்திரங்களை உருவாக்குவதாக இருக்கக் கூடாது என்றும், குழந்தைகள் வெற்றியையும் தோல்வியையும் சமமாக ஏற்றுக்கொள்ளும் பாதுகாப்பான சூழலை வகுப்பறைகளும் பள்ளிகளும் உருவாக்க வேண்டும் என்றும் கல்வியாளர்கள் வலியுறுத்துகின்றனர்.

மாணவர்களின் மனநலனைப் பாதுகாக்கும் பொருட்டு குஜராத் மாநிலத்தில் 9 முதல் 12-ஆம் வகுப்பு மாணவர்களுக்காக ‘பள்ளி நலக் குழுக்கள்’ (School Wellness Teams) அமைக்கப்பட்டுள்ளதோடு, ஹரியானா மாநிலத்தில் 200 அரசுப் பள்ளிகளில் ‘சாத்’ (SAATH) திட்டம் அறிமுகப்படுத்தப்பட்டுள்ளது.

மேலும், டெல்லி அரசு 25 வயதுக்குட்பட்ட மாணவர்களுக்கான விரிவான மனநலக் கொள்கையைத் தயாரித்துள்ளதோடு, ராஜஸ்தான் மாநிலத்தில் ‘குஷிசாலா’ (Khushishala) போன்ற திட்டங்கள் செயல்படுத்தப்பட்டு வருவது குறிப்பிடத்தக்கது.

மாணவர்களின் கல்வித் திறனுடன் அவர்களின் மனநலப் பாதுகாப்பையும் பள்ளிகள் சமமாகப் பேணி, அவற்றுக்குத் தகுந்த மனநல வழிகாட்டுதல்களையும் ஆலோசனைகளையும் முறையான உரிமையாக வழங்கும்போது மட்டுமே எதிர்காலச் சமுதாயத்தை ஆரோக்கியமான மற்றும் திறன்மிக்க முறையில் கட்டமைக்க முடியும்.