ஜப்பானில் சக்திவாய்ந்த நிலநடுக்கம்!
ஜப்பானின் வடக்கு தீவான ஹொக்கைடோவில் (Hokkaido) இன்று (ஏப்ரல் 27, 2026) அதிகாலை 5:24 மணியளவில் ரிக்டர் அளவில் 6.1 ஆகப் பதிவான சக்திவாய்ந்த நிலநடுக்கம் ஏற்பட்டது. சுமார் 80 கிலோமீட்டர் ஆழத்தில் ஏற்பட்ட இந்த நிலநடுக்கம், ஹொக்கைடோவின் மத்திய டோகாச்சி (Tokachi) பகுதியில் கடுமையாக உணரப்பட்டது.
ஜப்பானிய நில அதிர்வு அளவுகோலில் இது ‘அப்பர் 5’ (Upper 5) எனப் பதிவாகியுள்ளது. இந்த நிலநடுக்கத்தைத் தொடர்ந்து சுனாமி எச்சரிக்கை ஏதும் விடுக்கப்படவில்லை என்றும், கட்டிடங்கள் சேதமடைந்ததாகவோ அல்லது உயிரிழப்புகள் ஏற்பட்டதாகவோ உடனடித் தகவல்கள் ஏதும் இல்லை என்றும் ஜப்பானிய வானிலை ஆய்வு மையம் தெரிவித்துள்ளது.
கடந்த வாரம் இதே பகுதியில் ஏற்பட்ட 7.7 ரிக்டர் அளவிலான நிலநடுக்கத்தின் தொடர்ச்சியாக இது பார்க்கப்படுவதால், பொதுமக்கள் விழிப்புணர்வுடன் இருக்குமாறு அறிவுறுத்தப்பட்டுள்ளனர்.
